Monday, August 13, 2012

ആരുടെതാകാം, Whose it can be!



കയ്യിൽപത്രമേന്തി വാർത്തകൾ ചോർത്താൻ ഞാൻ

ചാരുകസേരയിൽ ചാഞ്ഞിരുന്നു.

സമീപത്തിൽ നിന്നെന്നെ നിദ്ര തലോടി

മിഴികളടഞ്ഞത് അറിഞ്ഞില്ല ഞാൻ.

മയങ്ങിയ നേരത്ത്  മനസ്സില്‍ തെളിഞ്ഞൊരു

മങ്ങിയ രൂപം  ആരുടേതാകാം ?

ഉണര്‍ന്നൊരു നേരത്ത് അനുഭവച്ചുഴികളിൽ

പരതി പരതി  ഞാന്‍ തപ്പിനോക്കി .

കുഞ്ഞിക്കാൽ പിച്ചവെച്ചു വീഴുവാൻ പോയപ്പോൾ
കൈചേർത്തു നടത്തിയ ജനനിയാകാം!
അതുമല്ലയെങ്കിലോ ഗൃഹത്തിൽ സഹായം തന്ന
അയലത്തെ വീട്ടിലേ ചേച്ചിയാകാം!


ചെറുപ്പത്തിന്‍ ചൂരിൽ ഞാൻ ഇളകിയ നേരത്ത്

വഴികാട്ടിത്തന്നൊരു ഗുരുവുമാകാം!

അതുമല്ലയെങ്കിലോ അറിയാതെ ചെയ്തുപോയ

അപരാധം ക്ഷമിച്ചോരു പിതാവുമാകാം!

മനസ്സിലേമുറിവിനാൽ  വിഷമത്തിൽ  ഇരുന്നപ്പോൾ
ഔഷധം  പുരട്ടിയെൻ  പ്രിയനുമാകാം!
അതുമല്ലയെങ്കിലോ  ഇരുളെന്നെ  മൂടിയപ്പോൾ
ഒരിത്തിരി  തെളിയിച്ച  മിത്രമാകാം!

ഗൃഹത്തിലേ ഭാരത്താൽ ശിരസ്സു ചരിഞ്ഞപ്പോൾ
ചുംബനം നൽകിയ പുത്രനാകാം!
അതുമല്ലയെങ്കിലോ  നീണ്ടയുറക്കത്തിൽ 
കരംഗ്രഹിച്ചുണർത്തിയ മുത്തിയാകാം!

പൊയ്പ്പോയ കാലത്തിന്‍  വീഥിയിലെവിടെയോ

എന്നെ തിരഞ്ഞൊരു മുഖവു മാകാം!

അതുമല്ലയെങ്കിലോ ഒഴുകിയ കണ്ണീർക്കണം

 ഒപ്പിയെടുത്തൊരു   ബന്ധുവാകാം!

  വഴിതെറ്റി വഴിവക്കിൽ സംഭ്രാന്തി പൂണ്ടപ്പോൾ

നേർമാർഗ്ഗം ചൂണ്ടി തന്നൊരു ശ്രീമാനാകാം!
അതുമല്ലയെങ്കിലോ ദാഹിച്ചുവലഞ്ഞപ്പോൾ
പാനീയം നൽകിയ മാന്യയാകാം!

ഓരോരോ ആനനം സ്‌മൃതിയൽ കടന്നപ്പോൾ
ബോധ്യമായ് നല്ലൊരു നീതിശാസ്ത്രം.
ജീവിത പന്ഥാവിൽ ധാരാളം മാനവർ
കരം നീട്ടി നമ്മളേ തുണയ്ക്കാനുണ്ട്.

മുന്നേറി പൊക്കോളൂ ശങ്കിച്ചു നിൽക്കേണ്ടാ
മാർഗങ്ങൾ തെളിയ്ക്കുവാൻ  ആരോ വരും.
മഹാ ഗോളത്തിൽ നമുക്കുള്ള ഭൂവിടം

മറ്റാരും  കൈയ്യേറി പോയിട്ടില്ലാ.

4 comments:

  1. Lovely lines dear....very deep and profound!

    ReplyDelete
    Replies
    1. Thank you very much.Ample blessings from the Almighty for your ensuing new life.

      Delete
  2. The face of life.. or our experience with our life. Nice thought

    ReplyDelete
    Replies
    1. Thank you,Sreekutta.My view of this comment has become belated.

      Delete