ഓണക്കാലം അന്ന് ഇന്ന്!

  കൊയ്ത്തുകാലമാഗതമായി,

  മിഴി തുറന്നു ചിങ്ങപ്പുലരികൾ.

    തിമിർത്തുനൃത്തം, മാരി മന്നിൽ  

       പുളകം കൊണ്ടു വസുധാദേവി.

                 

 പൊൻകതിർചൂടി വയലുകളെല്ലാം

 വിടപിയിൽ ശാഖികൾ  ചാഞ്ചാടി.

തഴുകീ രാവിൽ മന്ദസമീരൻ 

 സുഷുപ്തി പൂണ്ടു ക്ഷിതിമക്കൾ.

 കിഴക്കു ദിക്കിൽ സൂര്യനുണർന്നു

കർഷകർക്കു പുതിയൊരുണർവ് .

കൊയ്തുപാട്ടിൻ ഈരടി പാടി,

നെൽകറ്റകളും അട്ടികളായി.   

 അങ്കണം തിളങ്ങീ പൊങ്കറ്റകളാൽ,

ഉതിർന്നു വീണു നെന്മണിതിറമായ്.

അത്യുത്സാഹം ബാലികമാർക്ക്, 

താരുകൾ പെരുകീ പൂക്കൂടകളിൽ,

 

പൂക്കളം നിറഞ്ഞു അങ്കണം തോറും,

മലയാളപ്പെണ്ണഴകിൽ  മുങ്ങി. 

കാത്തിരുന്നു മാവേലിമന്നനെ, 

വരവേൽക്കേണം ഹ്ളാദപൂർവ്വം.  

 ഇന്നിൻ കാര്യമെന്തു ചൊല്ലാൻ?

 നെൽവയലില്ല  നെല്ലറയില്ല,  

കോൺക്രീറ്റിൻറെ  കൂറ്റൻ സൗധം,

 ഘാതം ചെയ്തു വയലുകളെല്ലാം.

മഴയും താരും തളിരും  കുളിരും

മുറകൾ തെറ്റി  കേരള നാട്ടിൽ,

മണ്ണിൻ മക്കൾ എവിടേയുമില്ല

മർത്യർ ഭൃത്യർ ഗോളവലയിൽ.

 

ഓണം കാണാൻ, പുത്തൻ മനുജർ 

 കാത്തിരിപ്പൂ,   ടി.വി.മുന്നിൽ

ഓണപ്പുടവയും പൂക്കളമഴകും

ഗോചരമിന്നു  ടി.വി.യിൽ മാത്രം.

  ഓണക്കഥകൾ  കേട്ടുരസിയ്ക്കാൻ

നേരവും  കാലവും  കുട്ടികൾക്കില്ല.

ഓണാഘോഷമഹോത്സവമേളം, 

ആഗതമോ  ഇനി  പഴയതാളം?