Wednesday, June 14, 2017

ഇന്നത്തെ കുട്ടികൾ !

തിരക്കിലാണെപ്പോഴും ഇന്നത്തെ കുഞ്ഞുങ്ങൾ 
ആരോടും മിണ്ടുവാൻ  നേരമില്ല.
ദിനകരൻ പൂകുമ്പോൾ നിദ്രയ്ക്കു വിടചൊല്ലി 
മനമില്ലാമനമോടെ വിടും കിടക്ക .

ചക്ഷുസ്സിൻ വാതിൽ മുഴുവൻ തുറക്കാതെ 
കക്ഷികൾ വീണ്ടും  കിടക്ക  തേടും
മാതാവിൻ വാണിതൻ മിനുസം മറഞ്ഞുപോയ്
അതു മെല്ലെ ശാസനാ രൂപം പേറും.

ദിനകർമപൂർത്തിയിൽ  കൂട്ടിലാക്കി ചരണം
ഗ്രന്ഥത്തിൻ ചുമടെല്ലാം ചുമലിലേറ്റും.
ചുമക്കുന്ന  ഭാരത്തിൻ തൂക്കമളക്കുമ്പോൾ 
സ്വന്തം  ശരീരത്തിൻ  മേലെയാകും.

ഒട്ടകതുല്യരായ്  ഭാരം പുറത്തേന്തി 
ഒറ്റക്കുതിപ്പിനു പഠിപ്പിനെത്തും.
 വിഷമമാം  വിഷയങ്ങൾ പഠിയ്ക്കുവാൻ ധാരാളം
ട്യൂഷൻ’  എന്നപേരിൽ   വേറെ  ആധിി.

സായംസന്ധ്യാനേരം  വീട്ടിൽക്കയറിയാൽ
ടീ.വീ യ്ക്കുമുന്നിൽ തപം ചെയ്തീടും.
പഠനഭാരത്തിൻറ്റെ ഇടയിലായ് ലഭിയ്ക്കുന്ന
ചെറിയസമയവും ആഘോഷിയ്ക്കും.

അമ്മയോതീടുന്ന മധുരമാം വാക്കുകൾ
അച്ഛൻറ്റെ രൂക്ഷമാം വീക്ഷണവും.
ഉണ്ടാക്കുന്നില്ലവരിൽ മാറ്റങ്ങൾ തെല്ലുമേ  
ഉണ്ടാകില്ല ഭയം  ഭവിഷ്യത്തോർത്ത്. 

 മുതിർന്നവർക്കാദരവും  ഭഗവാനിൽ ഭക്തിയും
ദ്യോതിപ്പിയ്ക്കും രീതി അന്യമാണ്.
മൃദുല വികാരമാം സ്നേഹത്തിൻ പരിമളം
നുകരുവാൻ കഴിവവർക്കുണ്ടോ ആവോ?

കാഴ്ചയ്ക്കു  ടീവിയും, കളികൾക്കു   കമ്പ്യൂട്ടറും
ചങ്ങാത്തം  നിലനിർത്താൻ  ഫോണും  മതി .
 ഊഷ്മളത ബന്ധത്തിൻ   കൂട്ടായ്മ ഗൃഹങ്ങളിൽ
 ഊഷരമായിപ്പോയ് ഇന്നുകളിൽ.

പ്രകൃതിമാതാവിൻറ്റെ  വാത്സല്യം  നുകരുവാൻ
അല്പംപോലും  അവർക്കില്ലാഗ്രഹം .
കിളിയുടെ  ഈണവും  മരങ്ങൾതൻ  മർമരവും
പതിയാറില്ലവരുടെ  കാതുകളിൽ.

 മുത്തശ്ശിക്കഥകൾക്കുകാതുകൾ നൽകാനോ
മുത്തശ്ശന്റെ സ്നേഹം നുകരുവാനോ
അവരുടെ  സാമീപ്യം തീരെയവർക്കില്ല 
അവരുടെ വാസമോ വളരെ ദൂരെ.

മാർക്കുകൾ ധാരാളം നേടാനുള്ളോട്ടത്തിൽ
 മറയുന്നു മൂല്യങ്ങൾ എങ്ങുമെങ്ങും.
പണംവാരും പദവികൾ സ്വപ്നം കണ്ടേവരും
അണികളെ കരുതുവാൻ മറന്നുപോയി.

എളിമയും നന്മയും എങ്ങോപറന്നുപോയ്
എവിടേയും നിസ്സംഗഭാവം മാത്രം.
ജീവിതയാഥാർത്ഥൃ വെയിലേറ്റു വാടുമ്പോൾ
പണവും പദവിയും രക്ഷയ്ക്കില്ല.

മാതാപിതാക്കളും  അധ്യാപക  വൃന്ദവും
ശ്രേഷ്ഠത  അവരിൽ  വളർത്തീടേണം.
ആദരം കാട്ടേണം ആദരം നേടേണം 
കുടുംബത്തെ  സേവിയ്ക്കാൻ  പ്രാപ്തി വേണം .

വളരട്ടെ  നൽപുള്ള മനുഷ്യ ഗണങ്ങളായ്
മാതാവാം  ഭാരതിയെ  വന്ദിയ്ക്കട്ടെ.
നഷ്ടം  ഭാവിയ്ക്കില്ല  നേട്ടം വരിച്ചീടും
പദവികൾ  താനേ തേടിയെത്തും.

7 comments:

  1. നന്നായിട്ടുണ്ട്. നല്ലൊരു ഗുണപാഠം ഉള്ള കവിതയാണ്.

    ReplyDelete
  2. വളരെ നന്നായിട്ടുണ്ട്. ഒരു പ്രാർത്ഥന പോലെ..

    ReplyDelete
  3. സന്തോഷം വിനിത.Thank you.

    ReplyDelete
  4. സന്തോഷമുണ്ടു്‌, വിനിത.

    ReplyDelete
  5. Awesome blog, i always enjoy & read the post you are sharing!
    Thank for your very good article...!

    ตารางคะแนนพรีเมียร์ลีก

    ReplyDelete
  6. It is supposed to be a poem.Thank you for the visit.


    ReplyDelete